ನನ್ನ ದೇಶ ನನ್ನ ಜನ
ದೇಶಪ್ರೇಮ • ಸಾಮಾಜಿಕ ಜಾಗೃತಿ • ಸಮಾನತೆ • ಭವಿಷ್ಯದ ಭರವಸೆ
ನನ್ನ ದೇಶ ನನ್ನ ಜನ
ನನ್ನ ಮಾನ ಪ್ರಾಣ ಘನ
ತೀರಿಸುವೆನೆ ಅದರ ಋಣ
ಈ ಒಂದೇ ಜನ್ಮದಿ?
ಕೆಂಪು ನೆಲದ ಹಸಿರು ಬೆಳೆ
ಕಪ್ಪು ಬಣ್ಣ ಮೊಗದ ಕಳೆ
ಸೂರ್ಯ ಚಂದ್ರ ಚುಕ್ಕಿಗಳೇ
ನಮ್ಮ ಹಿರಿಯ ಒಕ್ಕಲು
ನೂರು ಭಾವ ಭಾಷೆ ನೆಲೆ
ನೂರು ಬಣ್ಣ ವೇಷ ಕಲೆ
ಸ್ವಚ್ಛಂದದ ಹಕ್ಕಿಗಳೇ
ನಮ್ಮ ಹಾಡು ಬದುಕಲು
ಪ್ರಾಚೀನವ ತಿಕ್ಕಿ ತೊಳೆ
ವರ್ತಮಾನ ಜೀವಕಳೆ
ಉಕ್ಕೇರಲಿ ಬಾಳ ಹೊಳೆ
ಆ ಭವಿಷ್ಯದೊಡಲಿಗೆ
ಮೈ ಕೊಡವಿದೆ ಮೂಕ ಜನ
ಕೈ ಹಿಡಿಯಿರಿ ನಾಕು ಚಣ
ಎದ್ದೇಳಲಿ ಎಲ್ಲ ಗುಣ
ಆ ಸಮೃದ್ಧ ಬಾಳಿಗೆ
🌈 ಭಾವಾರ್ಥ
ನನ್ನ ದೇಶ ನನ್ನ ಜನ...
ಹುಟ್ಟಿದ ಮಣ್ಣು ಮತ್ತು ನನ್ನ ಜನರ ಗೌರವ, ಪ್ರಾಣ ನನಗಿಂತಲೂ ದೊಡ್ಡದು. ಈ ಒಂದೇ ಜನ್ಮದಲ್ಲಿ ತಾಯ್ನಾಡಿನ ಋಣವನ್ನು ತೀರಿಸಲು ಸಾಧ್ಯವೇ ಎಂಬ ವಿನಮ್ರ ಭಾವನೆ ಕವಿಯಲ್ಲಿದೆ.
ಕೆಂಪು ನೆಲದ ಹಸಿರು ಬೆಳೆ...
ನಿಸರ್ಗದ ಸೌಂದರ್ಯ ಮತ್ತು ಕಷ್ಟಪಟ್ಟು ದುಡಿಯುವ ಶ್ರಮಿಕ ವರ್ಗವನ್ನು ಕವಿ ಗೌರವಿಸುತ್ತಾರೆ. ಬೆವರು ಹರಿಸಿ ಬೆಳೆ ತೆಗೆಯುವ ಶ್ರಮಜೀವಿಗಳಿಗೆ ಸೂರ್ಯ, ಚಂದ್ರ, ನಕ್ಷತ್ರಗಳೇ ಮಾರ್ಗದರ್ಶಕರಾಗಿದ್ದಾರೆ.
ನೂರು ಭಾವ ಭಾಷೆ ನೆಲೆ...
ಭಾರತದ ವಿವಿಧತೆಯಲ್ಲಿ ಏಕತೆಯನ್ನು ಹಕ್ಕಿಗಳ ಸ್ವಚ್ಛಂದ ಹಾರಾಟಕ್ಕೆ ಹೋಲಿಸಲಾಗಿದೆ. ನೂರಾರು ಭಾಷೆ, ಕಲೆ, ವೇಷಭೂಷಣಗಳು ನಮ್ಮ ಸಂಸ್ಕೃತಿಯನ್ನು ಜೀವಂತವಾಗಿಟ್ಟಿವೆ.
ಪ್ರಾಚೀನವ ತಿಕ್ಕಿ ತೊಳೆ...
ಹಳೆಯ ಅಂಧಶ್ರದ್ಧೆ ಮತ್ತು ಮೂಢನಂಬಿಕೆಗಳನ್ನು ತೊರೆದು, ವರ್ತಮಾನಕ್ಕೆ ಹೊಂದುವಂತೆ ಬದುಕಿಗೆ ಹೊಸ ಜೀವಕಳೆ ತರಬೇಕು. ಆಗ ಭವಿಷ್ಯವು ಉಜ್ವಲವಾಗಿ ಹರಿಯುತ್ತದೆ.
ಮೈ ಕೊಡವಿದೆ ಮೂಕ ಜನ...
ಇಲ್ಲಿಯವರೆಗೆ ಶೋಷಣೆಗೊಳಗಾಗಿ ಸುಮ್ಮನಿದ್ದ ಜನರು ಈಗ ಜಾಗೃತರಾಗಿದ್ದಾರೆ. ಅವರಿಗೆ ಆಸರೆ ನೀಡಿ ಕೈಹಿಡಿದರೆ ಎಲ್ಲ ಒಳ್ಳೆಯ ಗುಣಗಳು ಹೊರಹೊಮ್ಮಿ ಸಮೃದ್ಧವಾದ ಬದುಕನ್ನು ಕಟ್ಟಿಕೊಳ್ಳಲು ಸಾಧ್ಯ.
.png)
